ممكن أطلب طلب

  لما بحب أطلب طلب من ماما بانتظر الوقت اللي بتبقي فيه حاجة مزعلاها

 وأعملها بحجة قال إييه علشان تروّق وأطلب منها أي طلب وبصراحة بقدر أقنعها في  الوقت دا بسهولة 

بحجة إني عاوزة أفرفشها وأخرجها من اللي هيا فيه .

readmore »»

نفسي في إييه ؟؟؟

أكييد كل واحد فينا نفسه في حاجات مش قادر يعملها ؟؟ !!!

مثلا ً أنا نفسي أركب المراجيح ..

ونفسي ألبس شتوي في عز الصيف والحر ..

 انت بقي 

إيه الحاجات اللي نفسك تعملها ومش قادر 

readmore »»

علشان خاطري : روق بيتك

زي ما إحنا بنروق البيت من الكراكيب اللي فيه بمعني إن الكراكيب اللي بقت قديمة ومالهاش لزمة نرميها واللي لسه
بتصلح للاستخدام نسيبها .
كماان إحنا محتاجين اننا نروق نفسنا وعقلنا بهذه الطريقة .
محتاجين نقعد لحظات مع نفسنا نعيد فيها ترتيب نفسنا وعقلنا من تاني .
نشوف الحاجات اللي بقت مالهاش لزمة ونشيلها من دماغنا علشان نريح نفسنا منها ونقدر نعيش وإحنا مرتاحين ومانلقيش حاجة بتنغص  علينا العيشة أو تتعبنا وتضايقنا !

readmore »»

أسيبكم شوية مع حبيبتي موزة الحبوبة

readmore »»

عن الوناسة

علشان أعرف أنام بالليل لازم أولع وناسة في الممر هيا صحيح 

مش بتديني ضوء كفاية 

 بس أهي بتنور الأوضة وخلاص , )

readmore »»

ناس وناس

وأنا بتفرج علي مسلسل الست أصيلة بتاع فيفي عبده وشوفت شخصية أصيلة وهيا بتضحي براحتها وسعادتها علشان 
راحة وسعادة ولادها ، كماان شوفت شيماء عقيد أو هبه اللي بتدور 
علي راحتها وسعادتها بس  .
قولت لنفسي أكيد في ناس زيهم بتعمل كده بردوه بمعني :

* إنه فيه ناس بتتنازل عن راحتها وسعادتها في مقابل إنها تشوف الأخرين مبسوطين  ومرتاحين ومش مهم تكون هيا مبسوطة ومرتاحة
 علي قد ما الاشخاص اللي حواليها وبتحبهم يكونوا مرتاحين .

* وفي ناس بقي بتدور علي راحتها وسعادتها ومش مهم راحة الأخرين .

* وفي ناس تانية بتحاول تجمع بين سعادتها وراحتها وسعادة وراحة الأخرين بس دول أنا بشوفهم عاملين زي اللي رقصوا علي السلم
 مش عارفيين هما عايزيين ايه ، يمين ولا شمال .. ؟
ومش عارفيين يوصلوا الي هدفهم وغايتهم ..

readmore »»

إزاي

إزاي أعرف إن النضارة دي حتليق عليا ولا لأ من غير مااقيسها أو أجربها ؟؟؟
وإزاي أعرف إنها مش حتتعبني ؟؟؟؟

readmore »»

عن الزراعة

ناس كتير بتزرع الشوك في حياتها وهيا متخيلة إنها بتزرعه علشان يحميها من الأخرين . !
لكنها في نفس الوقت لا تدرك إن الشوك دا لا يؤلم الأخرين
 فقط بل سيؤلم اللي بيزرعه أيضا ً
ولو حصل وحصدت العنب وإنت زارع الشوك فتأكد إنك زرعت بذرة غلط 
ولن تجني العنب طويلا ً..
 وما تزرعه ستحصده سواء اليوم أو غدا ً..
فمن زرع الشوك لايحصد العنب ! !

readmore »»

كل واحد فينا جواه بداية جديده ، بس هو يدور جواه 

دور جوه ذاتك

readmore »»

i love the rain

أنا بحب الشتا والساقعة . بحب المطره والطين وبحب أتفرج علي البرق والرعد  ..
بحب البطانية والكوفرته ..
بحبني وأنا لابسة كل اللي في الدولاب علشان أدفي  
~~~~~~~~~~~~~~~~~~~~~~~~
شوية فضفضة 
~~~~~~~~~ 

readmore »»

يامدرستنا ياحبيبتنا

عمري في يوم ماحبيت المدرسة ولا أيامها من أول KG1 لغاية تالتة ثانوي . 
ولا عمري حنيت ليها ..
يمكن أكتر أيام أنا حبيتها هيا أيام الجامعة ..
وكل ماقول لأختي أنا مابحبش المدرسة تقول لي من غير المدرسة ما كونتيش وصلتي للجامعة ، أقولها بردوه مابحبهاش ..
والسبب في كرهي ليها هو مدرس العربي اللي كان بيدرس ليا في إبتدائي .. واللي لسه بكرهه بكرهه لغاية يومنا هذا
المهم علي قد كرهي للمدرسة والمدرس دا كرهت مهنة التدريس بل وبتعامل مع المهنة بالمبدأ اللي بيقول إبعد 
عن الشر وغني له ..
بس أكيد لو فكرت أشتغل مدرسة حيبقي في مجال الحاسب الألي المادة اللي بفهم فيها مش عربي . 

readmore »»

SMS

لم أفتقدك !!!

ولم أتأثر بغيابك !!

بل لم ولن أشتاق إليك  !

هل تعلم لماذا ؟؟؟

لأنك أصبحت مرحلة في حياتي وأنتهت

 وأصبحت أتنفس بدونك 

وبقيت بالنسبة لي ذكري

readmore »»

بين الصراحة والغموض

زمان كنت صريحة جدًا وبحب الصراحة جدا جداً ، صريحة لدرجة إني ممكن أجرح الشخص اللي قدامي بصراحتي
أو بمعني أصح كنت بقول كل حاجة ، مابيتبلش في بوقي فوله  زي مابيقولوا هههههههههههههههههههههههههههههه .
كنت كتاب مفتوح لأي حد ، وممكن أي حد يعرف اللي عاوزة أقوله من نظرة عين .
لكن بسبب الصراحة دي تعرضت لمشاكل كتير ومضايقات من الأخرين ، بل وكان معظهم يغدر بي . ؟؟؟
ودا اللي خلاني أتحول من بنوتة صريحة إلي بنوتة تحاول أن تكون غامضة ، مش عايزة حد يعرف إيه اللي جواها .
مش قولتلكوا قبل كده أسوأ حاجة إن الشخص يلاقي نفسه مُضطر إنه يتنازل عن مبادئه الكويسه بسبب إنها
لا تناسب المجتمع والزمن اللي بيعيش فيه .
بث خلاص ....

readmore »»

أحمد يارب

أحمدك يارب علي نعمك اللي أعطيتها لي 

وعلي وقوفك جانبي 

شكرا ً علي نعمة أمي 

أحمدك علي كل شئ 

أعطيته لي 

شكراً لك يا أمي  

شكرا إلي أستاذي في الكلية 

علي مافعله من أجلي 

في الكلية ولن أنسي 

فضله عليا أبدا ً

 

readmore »»

اعترافات

عمري ما اهتميت بالسياسة ولا الأخبار بتاعتها حتي مدونتي مالهاش علاقة بالسياسة ولا بتتكلم فيها ..
لأني شايفة إني للسياسة دي ناسها كماان فيه في حياتنا إهتمات تانية أولي من السياسة صح ولا لأ .

إكتشفت إن الهدايا بتصنع المعجزات وهيا اللي بتقرب 
الناس من بعض أكتر وأكتر وبتخلي الناس اللي حواليك يهتموا بيك .
يعني لو أنا جبت لأي حد هدية بيهتم بيا ويشلني علي دماغه من فوق غير كده ما يعرفنيش وكأن الناس مابتعرفش بعض إلا علشان الهدايا .

ماليش أصحاب كتير لأني عمري ماحفظت عليهم ، وكنت بضيع كل أصحابي واحدة ورا التانية  لأتفه الأسباب
 والنتيجة أنا دلوقتي ماعنديش أصحاب كتيير . !

 أنا عمري ماحنيت إلي أيام زمان ولا نفسي أيام زمااان ترجع تاني أصلا ً 
لأن أيامي اللي بعيشها أحلي أيام .

readmore »»

حاجات نفسي فيها

نفسي أقعد علي كرسي هزاز زي دا  ساعة الشروق  ويكون حواليا

خضرة وزرع   والراديو شغال جمبي علي إذاعة الشرق الأوسط

وفي إيدي فنجان قهوة

نفسي في قطة صغنونة أربيها 

وأنيمها في حضني بالليل 

نفسي في عربية أمشي بيها 

براحتي في الشوارع 

نفسي ونفسي ونفسي ....... ) 

readmore »»

نفسي أضحك

 

محتاجة حاجة تضحكني وتخليني أنبسط ....

حاجة تخليني أفضل أضحك ...

بجد نفسي أضحك حتي ولو كنت حضحك من غير سبب .
تقولوا بقي  الضحك من غير سبب قلة أدب مش قلة أدب 
مش مهم المهم إني عاوزة أضحك وخلاص .
محتاجة حاجة مُفرحة عشان أقدر أضحك بيها ..
وبدور جوايا علي حاجة تفرحني عشان أرتاح

~~~~~~~~~~~~~~~~~~~~~~~~~~~~~

دي بقي بعض الكلمات عن السعادة : 

do one thing every day that makes you happy !!!

و ترجمتها : 

إفعل كل يوم شيئا ً واحداً ليجعلك سعيدا ً 

readmore »»

عن الفايرفوكس

بحس بمتعة لما بشغل النت عن طريق متصفح الفايرفوكس .
و بلاقيه أفضل من جوجل كروم بكتيير .
وبشعر معاه براحة نفسية رهيبة بعكس أي متصفح أخر ..
دا غير إنه سهل في التعامل معاه ، من حيث التحميلات
ومعرفة مكان ماتم تحميله ..
وتقدر توصل للذاكرة بتاعته بسهولة ...؟
وكمان لو بتعلب لعبة أو مشغل برنامج معين عن طريق النت يحتاج إلي إضافات
لن يتم تركيب هذه الإضافات إلا عن طريق الفايرفوكس أو التعلب المكار .
وفي الأخر كلها متصفحات ، وكل الطرق بتؤدي إلي روما   ولا إييييه.

readmore »»

عندما تفقد صديقا

في مرحلة من مراحل الحياة اللي مريت بيها عاشرت ناس إفتكرت إني مش حقدر أعيش من غيرهم .
وإن حياتي سوف تتوقف لو بعدت عنهم .. !
والأن هؤلاء الأشخاص أصبحوا مجرد ذكري لي .. ووجدت نفسي أقدر أعيش من غيرهم .
وسألت نفسي .. هل أنا لم أكن أحبهم ؟؟ 
ليه نسيتهم بهذه السهولة ؟؟؟
ولا أتذكرهم إلا نادرا ً ، و إندهشت لأني قدرت أشطبهم من حياتي إلي الأبد دون أن يتركوا أثر داخلي . !
وهل دا نوع من عدم الوفاء ليهم . لا أعلم ؟؟؟؟  !

readmore »»

لولولولولي

يوم 27/7/2010 ودعت الكلية بعد ما استلمت ملفي والشهادة المؤقته منها .
ودعتها بحلوها وبمرها ، ودعت الدكاترة الحلويين والوحشيين .
ومش عايزة أقول ليكوا علي إحساسي ساعتها : )
كنت حاسة ولأول مرة إني عارفة أتنفس الحمد لله وحسيت وقتها براحة كبيرة إني خلاص مش حذاكر تاني .
وإنه مافيش إمتحانات ولا وجع دماغ وقرف تاني .
يوم 27/7/2010 ودعت المدرجات أ ، ب ، ودعت مكاني اللي كنت بقعد فيه بإستمرار من أولي لغاية رابعة وهو
البنش الأول ولابد أن يكون وجهي في وجه الدكتور كأني حصوره هههههههههههههههههههههههههههههههههههههههه .
ودعت معامل الكمبيوتر والمكتبة ومكتب وكيل الكلية اللي كنت بشوفه  الأب اللي نفسي فيه .

readmore »»

my ♥ cat‘s

أنا بعشق القطط وروحي فيهم بس بحب القطط النضيفة .. وبعشقهم بأي لون ماعدا الإسود 

ـــــــــــــــــــــــــــــــــــــــــــــــــــــ

بعشق القطط لدرجة إني لما بشوف القطط اللي عند جارتنا بتهبل عليها ..

وببقي عايزة ألعب معاها وأشيلها .

:)

بحبهم لدرجة إني نفسي أخد قطة في حضني بالليل في السرير وأنام بيها : )

ـــــــــــــــــــــــــــــــــــــــــــــــــــ

بحبهم لدرجة الجنون ، وبفرح لما جارتنا بتدينا قطة من قططها ،بنسي الدنيا معاها ساعتها وبقعد جمبها أتفرج عليها 

وهيا نايمة . وهيا بتاكل ) وبحبهم أووي وهما لسه مولودين .

ونفسي أربي قطة وأشيل عيالها .

ــــــــــــــــــــــــــــــــــــــــــــــــــــ

ماما دايما تقول لي إن القطط غدارة وممكن تعض صاحبها حتي لو عامل إيه معاها لو حسيت بالخوف 

ــــــــــــــــــــــــــــــــــــــــــــــــــــ

بس بردوا بحبها وبحب أعاشرها ...

 

readmore »»

عن الحقيقة والخيال

إكتشفت إن هناك أشخاص يتعايشون في الخيال ويعيشون طويلاً فيه بل ويحولونه إلي حقيقة ..

صحيح إ ن الخيال يجعل الواقع جميللا ً ، و أحيانا ً نحتاج إلي أن  نهرب من الواقع الذي نتعايشه

إلي الخيال لفترة قصيرة ولو لخمس دقائق ..

لكن هذا ليس معناه أن أتعايش في الخيال طويلا ً و أحوله إلي واقع ؟ !

=================

“ الخيال.. هو ليل الحياة الجميل

هو حصننا وملاذنا من قسوة النهار الطويل
!إن عالم “الواقع” لا يكفى وحده لحياة البشر

إنه أضيق من أن يتسع لحياة إنسانية كاملة ” 

readmore »»

كلام هجايص

بتعب لما بلاقيني مُضطرة  أن أتنازل عن المبادئ والصفات الكويسة اللي تربيت عليها ونمت بداخلي لأنها أصبحت لاتتناسب 
 مع الزمن الذي نعيش فيه ،دا غير إن البعض يري هذه المبادئ والصفات هبل . 

 وإني مادام كويسة من جوايا أبقي مش عارفة حاجة في الدنيا . 
بنتولد مش داريين بالرايحين والجايين نكبر وتكبر فينا أعمار السنين ..
بنكره السنين وتكرهنا السنين ونجرح البشر ونجرح أنفسنا مع إننا بنتولد طاهرين وصافيين .

readmore »»

لحظة ضياع الحب

 أصعب حاجة إن الشخص اللي كنت بتحس معاه بالأمان ، 
وكنت بتفتقده حتي وهو معاك ..وكنت تراه 
إنسان مختلف وإنك ماتقدرش تعيش من غيره تفقد الثقة فيه فجأة 
ولأي سبب تعطيه ظهرك .....!
وتلاقي شعورك بالأمان معاه لم يعد موجوداً !!!
ولم يعد غيابه يوجعك بل ولم تفتقده ولن تحس بغيابه أصلا ً وتفقد الثقة فيه .؟
ساعتها بس يا إما إنت ماكونتش بتحبه من الأول أو  يكون ضاع الحب .

readmore »»

(9)

(1)

بنتولد طاهرين بنتولد شبعانين ، وأول مابنتولد بنكون فرع أخضرلسه مافقدش نضارته وحيويته .. وبنتربي علي 

صفات ومبادئ كويسة لكن بمرور الأيام يجد الشخص نفسه مضطر أن يتنازل عن هذه الصفات والمبادئ لأنها 

أصبحت لا تتناسب مع الزمن الذي يعيش فيه .

(2)

بكره سوء الظن اللي بيخليني أفهم الناس غلط  ! ويدفعني إلي ظلم ناس ليس لها أي ذنب ، بكرهه عشان 

بيخليني أشك في اللي حواليا .. 

كمان بكره الإندفاع اللي بتبقي نتيجته تصرفات خاطئة . ! 

 (3)

حاجة عبيطة 

لما بقابل زميلة دراسة في الشارع وبتبقي هيا فاكراني وأنا ناسياها 

بعمل نفسي فاكراها علشان أداري إحراجي ..

 (4)

نفسي أعيش في مدينة السعادة بتاعة إعلان كادبري ديري ميلك .

(5)

بحب عروستي بسكوته لأنها بريئة براءة الأطفال ، بحبها عشان مش فاهمة حاجة ولا فهماني  .

(6)

نفسي أركب مراجيح أووووووووووي .

(7)

23

أكتر سنه أكدت لي إني كبرت بس مش فارقة معايا

 أنا حاسة من جوايا إني لسة صغيرة : (.

(8)

نفسي أستمتع بأي حاجة أنا بعملها وبالحاجة اللي حواليا .

(9)

توتة توتة : )

readmore »»

عن الكراكيب

الكراكيب هي الأشياء التي تم تركها لفتره مش قصيرة وبالتالي لم يعد لها قيمة ..
وزي مافيه في المنزل كراكيب تحتاج إلي ترتيب وتنظيم والشئ اللي أصبح 
مالوش قيمة نرميه .
، يوجد أيضا ً في العقل كراكيب تحتاج إلي ترتيب.
بمعني إنه نبحث في عقولنا عن أشياء أو أشخاص  لم يعد له قيمة في حياتنا ونحذفة من العقل حتي لا ينشغل 
العقل بأفكار قديمة .
كمان نشوف إيه الهوايات أو الحاجة الحلوة اللي كنا بنحب نعملها زمان وبطلنا نعملها  ونحاول نرجعها من تاني ..
فإيه فائدة الإحتفاظ بشئ مادي إنتهي وقته وزمنه ولم يعد له قيمة ...
وما أهمية الإحتفاظ بذكريات قديمة لم يعد لها قيمة  غير إنها بتتعب النفسية فقط لما بنفتكرها ؟
وبمناسبة الكلام دا إفتكرت كركوبة كنت بعملها وقت الدراسة وهي كتابة المذكرات وعشان أنا بحب الكتابة بحاول أرجع ليها من تاني .

بس خلاص .




 

readmore »»

حالتي النفساوية

أنا دلوقتي حاسة بالراحة والهدوء الحمد لله .. الله وأكبر إمسكوا الخشب ...
واثقة في نفسي بس مش لدرجة الغرور واثقة في ربنا ، متطمنة علي بكره 
بس مش أووي يعني .. وبدعي ربنا إنه يجيي أحلي من إمبارح ،
ومتفائلة وشايفة الدنيا بألوان قوس قزح .. ونفسي دلوقتي في 
فنجان قهوة  وقعدة علي البحر .

readmore »»

درس خصوصي

الصورة من مدونة بنوتة لاسعة 

كنت بفتكر المدرسة اللي كنت فيها وأيامها ..

إفتكرت كل اللي عملته فيها وكل اللي حصل لي فيها ..

 لكن مين فينا  مالوش مدرس أو مدرسة ليه أحلي ذكريات في دماغنا ..

وفيه بردوه ناس تانية تخلي الواحد يكره المدرسة وأيامها ..

وبمناسبة الكلام دا أحب أقول كام حاجة كده محشورين في زوري :

* مش مسامحة مدرس العربي اللي درس لي في ابتدائي وكتب لي علي السبورة جملة كانت صعبة اوي عشان أعربها ،
ولما ماعرفتش ضربني عشرة أقلام علي وجهي  لغاية لما إزرق .

* مش مسامحة نفس المدرس اللي قعد يشخبط علي  اللوحة اللي كنت عاملاها لمادة الدين وعشان ماعملتش للعربي قعد 
يشخبط عليها .

* مش مسامحة مدرسة الرياضيات اللي درست لي في إبتدائي ، وضربتني وشدتني من شعري عشان كنت غلطانة في 
الواجب .


* مش مسامحة مراقب الثانوية العامة اللي بهدلني قدام اللجنة والمراقبين عشان كنت كاتبة في ورقة الإجابة بقلم بيقطع 
، وماكانش معايا غيره وقتها وماكلفش خاطره إنه يشوف لي قلم تاني .

ومع ذلك بحب مهنة التدريس .

readmore »»

*بنتولد*

بنتولد طاهرين بنتولد شبعانين بنتولد متلهفين
على صدر ام وكتف اب مرتاحين
بنتولد باكين بنتولد مش عارفين
بنتولد مش خايفين واسمنا فى درب الحياة بنى ادمين
بنتولد دفيانين بنتولد صافيين بنتولد صادقين
كما زرعة خضرا فى ارض طين زرعة احصادها احصاد عمر السنين
الحلو و المر و الطيب و الحزين
بنتولد مش داريين بالرايحين والجايين
نكبر، وتكبر فينا أعمار السنين
بنكره السنين وتكرهنا السنين
ونجرح البشر ونجرح نفسنا مع إننا بنتولد...

readmore »»

چني

وحشتيني .. يا چني

أنا مبسوطة إن إنتي رجعتي ، رجعتي أحسن من

الأول 

رجعت واثقة في نفسها وفي ربنا ..

أنا دلوقتي بحاول أدور علي الحاجات

الحلوة اللي جوايا عشان أنميها 

وبقي أحسن أكتر و أكتر : |

readmore »»

رمضان كريم

بالرغم من إن رمضان خلص ، بس حبيت أتكلم في الموضوع دا ..
موضوع رمضان وما يتعلق به من عبادات ، في ناس فاكرة إن العبادة بتكون في رمضان بس ، لكن في الحقيقة العبادة
بتكون في رمضان وغير رمضان ..
فاكرين انهم مادام ذكروا الله وصلوا التراويح وقروا قرآن يبقي كده خلصوا اللي عليهم . !
 وكل الحاجات الوحشة اللي بطلوها في رمضان مثل التدخين مثلا ً ، بيرجعوا ليها تاني بعد انتهاء الشهر الكريم  ! !
طب ليه ماجعلش رمضان السلم اللي حيخليني أمتنع عن الحاجات السيئة دي ؟
فمثلا اللي بيدخن طبعا ً بيبطل التدخين في نهار رمضان عشان الصيام صح ولا لأ ؟
يبقي ليه ماجعلش رمضان وسيلة للإمتناع عن التدخين ، وخاصة إنه مش يوم ولا اتنين وإنما ثلاثين يوم الثلاثين يوم 
دول مش كفاية عشان أبطل تدخين !
بس خلاص 
وكل سنة وإنتم طيبين .
وربنا يعود عليكم وعلينا الأيام دي بخير  .

readmore »»

أي كلام فاضي معقول

 

تفتكروا ينفع الأيس كريم بالبطيخ .. ؟ ياريت لو ينفع 
حد يقول لي : )

************************

الكرش لا يعطيني  إحساس بالإستقرار بل يشعرني بالتوتر والقلق .. ولما بشوف 

واحد بكرش بحس إنه مش عارف يتنفس أصلاً 

************************

كنت أجد متعة عندما أنتقم من  أي شخص أساء لي ، لكن وجدت المتعة في إني أفوض أمري 

فيه إلي الله أليس هذا أفضل بكتير .

 ************************

الإساءة تكون حاجز بيني وبين الشخص الذي أساء لي ، وتجعلني أتعامل مع الناس

بحرص .. وتفقدني الثقة فيهم 

************************

مافيش أجمل من الهواء النقي بتاع ساعة الفجرية وقبل شروق الشمس 

بقليل ، بجد بحب أخد جرعة الهواء دي ، قبل ما اعمل أي حاجة 

************************

بحب اللون الروز والسماوي ولما بنظر ليهم ، ألاقي الدنيا بشكل تاني خالص 

 

************************

 يا صباح الخير ياللي معانا : )

readmore »»

كلام فارغ

لما بشغل متصفح الفايرفوكس ، أول حاجة بعملها هيا إني بدخل أشوف المدونة ..

لأني ببقي عاوزة اقرا كلامي اللي أنا كاتباه .. وأضع نفسي مكان الناس اللي بتقراه

وأشوف شعورهم إيه من ناحية المدونة هل بتعجبهم ولا لأ  ، وإيه اللي بيحسوه

من الكلام اللي بكتبه .

******************

أنا مش بكتب عشان الناس تقولي الله حلو ، لكن أنا بكتب علشان دي الوسيلة الوحيدة اللي

بتريحني من ناحية ، ومن ناحية أخري عشان أنا بحب الكتابة .

readmore »»

متفرقات

المشكلة إنك أصلا ً لاتمنح لنفسك فرصة للفهم وبالتالي لا تستطيع فهم الأخرين ولا تقدر تتحمل تصرفاتهم 

، ودا في حد ذاته بيتعبني .  

أسوأ حاجة أن تبتسم لشخص أمامك .. وتعامله معاملة كويسه 

وتكتشف بعد ذلك إنه بيطعنك في ضهرك .

كل واحد فينا جواه بداية  جديدة بس هو يدور جواه 
دور جوه ذاتك 

لما بسمع أي بنت بتقول صاحبي ، بتعب أووي من الكلمة دي .

طويل العمر يطول عمره ويزهزه عصره وينصره 

علي مين يعاديه . هاي هئ ..

“الخيال.. هو ليل الحياة الجميل
هو حصننا وملاذنا من قسوة النهار الطويل
!إن عالم “الواقع” لا يكفى وحده لحياة البشر
إنه أضيق من أن يتسع لحياة إنسانية كاملة”

readmore »»

عن القطط

إكتشفت إن القطط لا تشعر أبداً  بالأمان  مهما تأكلها وتشربها ، وإن حاولت أن تقترب منها تخاف منك وخاصة إن 
كان حولها عيالها تشعر بالذعر منك ، وأكبر دليل إنك لما تحاول تقرب من عيالها تعضك بمنتهي الشراسة .. 
يعني مثلاً جارتنا عندها ثلاث قطط صغيرين وأنا بحب القطط أوي 
فلما بشوفهم في الطالعة والنازلة بقعد ألاعبهم وأشيلهم وياحومتي
بقي علي اللي بيحصل لما بشيل واحدة منهم .
تفضل تخربشني بإيديها في إيديا لغاية لما تنزل بس بعد إيه بعد 
ماتكون عورت إيديا ههههههههههههههههههههههههه.
المهم جارتنا دي لابتدلعهم ولا حاجة بالرغم من إنها بتحبهم ..
دا غير إنها بتضع ليهم كل أنواع الأكل عشان مايتعودوش علي نظام معين .
لكن السؤال :
هل يمكن لإنسان محروم من الأمان أن يمنحه لتلك القطط الضعيفة ، وإذا كان ممكن كيف ؟
لا أعلم .
 

readmore »»

عن الفيس بوك وتويتر

لما إكتشفت إن المدونة لازم أعملها صفحة ع الفيس عشان تتنشر ، دخلت أشوف إيه موضوع الفيس بوك دا ،
وبصراحة لم أشعر بإرتياح ناحيته ، وتخفيفاً علي نفسي قررت أن أحدد بالضبط إيه اللي بكرهه في الفيس :

* أما بدخله بحس إني في متاهة ومش بعرف راسي من رجلي فيه . |
* بحس إني في سيرك ، وإن كل واحد عنده صفحة بيعرض مواهبه فيها والناس بتتفرج عليه
* أكتر حاجة بتغيظني في الفيس دا كلمة  LIKE اللي الصفحة بتطالبني بيها كل شوية
* دا غير إنه أنا أصلا مش بحب الزحمة والفيس بوك زحمة لوحده .

أما تويتر أو موقع العصفورة كما أسميه ، دا بقي موقع خفيف الضل بلاقي كُل حاجة أمامي ، وبحس إن كُل اللي فيه
في الهوا سوا .. فمثلاً علي يمين صفحة تويتر يوجد ريشة أول ماتضغط عليها ، يفتح لك مربع إنشاء تغريدة جديدة
شوفت سهوله أكتر من كده .
                                       وبس دا كل الموضوع   

 حبيت بس أوضح رأيي في الموقعين 

readmore »»

التدوين وأنا

دخلت عالم التدوين والمدونات بالصدفة ، فعندما قرأت في مدونة ياما دقت علي الراس طبول التي تملكها الكاتبة والمحامية
أميرة بهي الدين ومدونة لافندر لمها العباسي نمت في دماغي فكرة التدوين ..
وعندما قرأت  مدونة بنوتة لاسعة لسارة درويش ، نمت أ كتر وأكتر في دماغي فكرة إنشاء مدونة ،
ولا أتبع إسلوب معين في الكتابة ، بل أكتب بعفوية ، أكتب كل شئ يأتي في بالي وهذا هو ميزة التدوين ..
أما عن كيفية كتابة البوست ؟
فدائماً وقبل الكتابة في المدونة أجهز أفكاري علي الورق أولاً ، ثم أراجعها مرة أخري ..
وأعمل عليه قليلاً من التعديلات النهائية .. ويكون أمامي هدف واحد وأنا أدون هو إن أفكاري هي ذاتي ،
ومدوناتي هي أنا .

readmore »»

عروستي حبيبتي

 

بحب اقتناء العرائس ، وبحب عروستي بسكوتة وحُبي لها وتعاملي معها يكون بدافع غريزة الأمومة أحياناُ وإخوات أحياناُ

أُخري :|

فلما بحضنها أشعر بالسكينة والراحة والسعادة ..

وعندما أصنع لها فستان جديد أشعر بأني إشتريت لبس العيد ..

فأنا بعشق العرائس أووى وصناعة الفساتين لهم .

ويعجبني شعر عروستي وهو ملقي علي الكتفين ،وبشعر بسعادة وأنا بدلعها وأمرجحها تمام كما لو كانت طفلة بحق وحقيقي.

وأقدر أعيش معها طول الوقت بدون ما أزهق منها ، ولاتفارقني حتي في نومي .

بحب عروستي بسكوتة لأنها بريئة ومش فاهمة حاجة ، بحبها عشان بحس إنها زي الأطفال بالضبط .

وبالرغم من إني كبرت .. لم أتخلي عنها بل وأقدر أتعايش معها وأحملها في كل مكان ، فأحلي حاجة في 

الدنيا العرائس .

readmore »»

مملكتي

ليا بيت فيه وردة وكتاب .. يليق بمكان هادئ علي البحر ..

يليق بصوت العندليب الأسمر عبد الحليم حافظ .

readmore »»

عن المطبخ

لم أكره المطبخ لكن في نفس الوقت ماعنديش مهارة الطبخ ولافنون الطبيخ ، ونفسي يكون عندي مطبخ زي اللي 

في قناة فتافيت عشان أعمل فيه كل أنواع وأشكال الأكل .

وبالرغم من حُبي للمطبخ .. توجد فيه بعض الأشياء التي أكرها فيه .

ومن هذه الأشياء :

(1) البصل 

أكره الألم اللي بيسببه لعيني ولأنه بيخليها تبكي .

(2)  السكينة 

وماتسببه من ألم وجروح ليدي .

(3) الزيت

أكره الحروق التي يسببها في وجهي ويدي .

كمان أكره الروائح الزفرة التي تتبقي في اليد بعد الطبيخ .

..............

هذه هي الأشياء اللي بكرهها في المطبخ ، لكن بحب التنوع في الأكل وبحب اللحم العصاج ، الفتة ، تقلية الكشري ، 
والباذنجان أبو تقلية وصينية الجلاش الحلو والبسبوسة وبلح الشام

readmore »»

وعد

بإني هـــــــ  كون فريش ع طول : )

readmore »»

أخيرااااااااااااً

زي اليومين دول من 10 سنين قررت قرار مصيري لوحدى وماسمعتش كلام ماما .. ورفضت نصايحها بإني أدخل ثانوي 

تجاري لأنه أفضل من الثانوي العام وحجيب فيه مجموع كويس يدخلني الكلية وأنا مرتاحه ،، لكن رفضت الكلام ده 

ودخلت ثانوي عام وإخترت القسم الأدبي  !!

****

ومن 7 سنين ظهرت نتيجة الثانوية ، وقتها جبت مجموع هو كان معقول للأدبي لكن مش حلو بالنسبة لي ، وفشلت في 

علم النفس والجيولوجيا .

****

 بعدها دخلت كلية الحاسبات ورغم إني ماحبتهاش في الأول بس لاقيت المواد  فيها سهله وأعرف أذاكرها !!

****

معيدين الكلية  كانوا أصعب ناس قابلتهم في حياتي 

بالرغم من إني كنت قرفانة ومتضايقة منهم ، بسبب اسلوبهم السيئ لكن أنا ما اهتمتش بدا ، واتعرفت علي بعض

منهم ، وبدأوا يعرفوني ، ودا فرحني أووى    !!

****

بالنسبة للإمتحانات بقي كنت ببدع فيها ..

****

في أول سنتين كنت عيلة أوى مع زملائي وزميلاتي وكنت بتخانق معاهم علي الأماكن !!

****

دكاترتي اللي بحبهم مش هقدر أتكلم عنهم ، بس دول اللي كانوا بيصبروني علي جحيم المعيدين .....

****

كتبي 

اللي صفحاتها مليانة بالشخبطة فيها في المحاضرات ؟؟؟؟؟؟

****

يااااااااه أخيراااااااااً اتخرجت !!

ومش هذاكر تاني 

ومافيش رخامة من حد تااااااني 

الحمد لله

readmore »»